நிறக்குருடனின் மடல்


அன்புள்ள அனுர,
ஒரு அப்பாவி நிறக்குருடனின் மடல் இது
நீங்கள் இப்போது
ஒரு புதிய நிறத்தை வரிந்திருப்பதாக
நண்பர்கள் சொன்னார்கள்
எனக்கு முன்னமும்
நிறக் குருடு இருந்ததால்
உங்கள் பழைய நிறத்தையும்
என்னால் பிரித்துப் பார்க்க இயலவில்லை
மன்னிக்கவும்.

இப்போது இந்தக் கடிதத்தை
நீங்கள் வரித்திருக்கும் நிறத்தை
அறியவேண்டி வரைகிறேன்.

அன்புள்ள அனுர
இப்போதும் நீங்கள்
எல்லா இனவாதமும்
ஒரேமாதிரியானவை என்றுதானா
சொல்கிறீர்கள்?
பேரினவாத என்ற சொல்லுக்கு
இணையான சிங்களச் சொல்லை
நீங்கள் இன்னமும்
கண்டடையவில்லையா?

எட்டை ஒன்பதாக்கியதை
இப்போதும் கூட்டங்களில்
பெருமையடிக்கிறீர்களா அனுர?
பழைய (போர்க்)குற்றம் பற்றியும்
புதிய (போர்த்)தளபதி பற்றியும்
எப்போது பேசுவீர்கள் அனுர?

சிதறிய தலைகள்
அதைப் பார்த்து அழுத கண்கள்
காணாமற்போன உறவுகள்
அதைப் பார்க்கக் கிடைக்காது அழுத கண்கள்
குதறப்பட்ட உடல்கள்
அதைப் பார்க்க முடியாது மூடி அழுத கண்கள்
எப்போது நீங்கள் பார்ப்பீர்கள் அனுர?
எப்போது பேசுவீர்கள்?
எப்போது அனுர?

தமிழர்களுக்கு தீர்வு
எனக் கேட்டால்
சுயநிர்ணயம் சுயாட்சி என்ற
சொற்கள் கேட்டால்
அதற்குப் பதிலுரையாற்றிய பின்னர்
நீங்கள் பூக்கும் புன்முறுவலில்
ராஜபக்சேக்களை கண்டதாய்
அதே நண்பர் சொன்னார்
உண்மைதானா?

மலையகத்தில் சம்பளம் மட்டும்தானா
பிரச்சினை?
காணி வீடு எல்லாம் வறுமைப்
பிரச்சினைதானா அனுர?
அவர்கள் இந்திய ஆதிக்கக் கூறுகள் என
உங்கள் முன்னோர்கள் சொன்னார்களாமே
நீங்களுமா சொல்கிறீர்கள்?

அப்படியே முஸ்லீகள்
குருதி வழிகிறதே
அதற்கும் உங்கள்
"எல்லா இனவாதமும்"
பல்லவிதானா அனுர?
அனுர,

 ஊழல் ஊழல் என்று நீங்கள்
உறுமியதாய் நண்பர் சொன்னார்
நடந்ததும் ஊழலால்
நடப்பதும் ஊழலால்
தடுக்காவிட்டால் நடக்கப்போவது
ஊழலால் என்று
ஊழல் கீதம் மட்டுமே
உரைக்கிறீர்களாமே?

முதலாளித்துவம் எனும் சொல்லை
நீங்கள் மேடைகளில் சொல்லி
எத்தனை நாட்கள் ஆகிறது அனுர?
உங்கள் பெரியவர்கள்
எதும் நினைத்துக் கொள்வார் என்று
நீங்கள் நினைத்துக் கொண்டீர்களா?

காலில் விழும்போது
மகாநாயக்கர்களின் பாத அழுக்குகளை
துடைத்து விட்டது பற்றி
அவர்கள் மகிழ்வடைந்தார்களா?
முக்கியமானதை மறந்து விட்டேன் அனுர,
அடுத்த வருட
மேதினம் எப்போது வரப்போகிறது?
அதையும் அவர்களிடம் கேட்டுத்தான்
சொல்ல முடியுமா, அனுர?

இப்படி,
நிறைய கேள்விகள் இருக்கின்றன அனுர,
பதில்கள் கிடைத்தால்
கணக்குப் போட்டு
நிறத்தை கண்டடைய வசதியாய் இருக்கும்
அன்புள்ள அனுர.

ஒருவேளை பதில் சொல்ல
சங்கடப்பட்டாலோ
அதிக கேள்விகள் என்பதால்
நேரமில்லாமற் போனாலோ
இந்தக் கேள்விக்கு மட்டும்
பதில் சொல்லுங்கள்
இப்போதும் உங்கள் நிறம் சிவப்பில்லைத்தானே,
அன்புள்ள அனுர?

இப்படிக்கு
அன்புள்ள
நிறக் குருடன்

Comments

Post a Comment

Popular posts from this blog

மெய் நீ

Image
குறிப்பு: ரிச்சட் ஸ்டால்மனின் "Made for You" என்கிற விஞ்ஞானப் புனைவின் மொழிபெயர்ப்பே இது. அதிகம் கலைச் சொற்கள் பயன்படுத்தப்பட்டிருப்பதால் கொஞ்சம் பொறுமையோடு வாசிக்க வேண்டுகிறேன். பயன்படுத்தப்பட்ட சில முக்கிய கலைச்சொற்களை முன்னமே குறிப்பிடுவது வாசிப்பை இலகுவாக்கும் என நம்புகிறேன். virtual - மெய்நிகர் programming-  நிரலாக்கம் reprogramming- மிள்நிரலாக்கம் virtual mind - மெய்நிகர் மூளை virtual adjunct - மெய்நிகர் இணைப்பு, மெய்நிகர் பிரதி சிறுகதைக்கு பொருந்தும் வகையிலும் வாசகர்களின் இலகு புரிதலுக்காகவும் கலைச்சொல் பயன்பாட்டில் இயலுமானவரையில் இலகு நடையை பின்பற்றியிருக்கிறேன். ********************************************************************************** “அப்பழுக்கில்லாத ஒருவர் இந்த இயற்கையில் இல்லை. அப்படியான துணை உங்களுக்கானவராய் வேண்டுமா? எங்களிடம் வாருங்கள். தயார்செய்து தருகிறோம்.” ‘துணை’ நிறுவனத்தின் இந்த விளம்பரத்தை வாசிக்கும், வயது போய்க்கொண்டிருக்கும், காதல் மேகம் மீண்டும் தன்னைக் கடக்கும் என்ற நம்பிக்கையும் தொலைந்துபோன ஒருவனுக்கு ஆர்வம் பிறப்பது ஆச்சர
Read more

நீந்தத் தெரியாத கனவுகள்

Image
புத்தகப் பை அடுக்கத் தெரிந்தவர்களுக்கு நீந்தத் தெரியாததுதான் குற்றம் என்று தேவையற்றதை திறக்கும் விழாக்களில் அவர்கள் பேசக் கூடும்.   தாங்களே அதிக பாலங்கள் கட்டியதாகவும் சான்றாக அவர்களது வண்ணமய மாளிகைகளை நாங்கள்தான் சிறப்பாய் செய்தோம் என்கிற வார்த்தைகளோடு அவர்கள் காட்டக் கூடும்.   அவர்கள்தான் இவர்கள்தான் என இரண்டு பக்கங்களில் இருந்தும் கைகள் நீளக் கூடும்.   நாளைய அனர்த்தத்தை இன்றே தடுக்க நகரங்களின் மத்தியில் சில நீச்சல்குளங்களும் நீச்சல் வகுப்புகளும் உருவாகவும் கூடும்.   மக்களை அமைதியாக்க இறந்தவர்களுக்கான ஒரு புதிய தூபியை அவர்கள் முன்மொழிவார்கள் அது கட்டப்படப் போகும் விளையாட்டு மைதானத்தின் மூலையிலோ அல்லது கட்டிமுடித்த புது விகாரையின் புனிதத்தை குழைக்காது எல்லைக்கு வெளியேயோ எழுப்பப்பட்டு நீந்தத் தெரியாத கனவுகள் என பெயர் சூட்டப்படக் கூடும்.   மக்களைக் காத்தல் என்கிற ஒன்றைத் தவிர இந்த சபிக்கப்பட்ட தேசத்தில் எல்லாமும் நடக்கக் கூடும்.
Read more

மலையின் பெயர் என்ன?

வானம் சிவந்து கிடக்கிறது என நீ சொன்ன கணத்தில் நானும் வானம் பார்த்தேன், அடர் கருநீலத்தில் விரியும் சிறு ஒளியுடன் இருந்தது, நான் பார்த்த வானம்.   மலைமுகட்டின் உச்சியில் தெரியும் சின்னப் பூவை பார்க்கச் சொன்னேன். பூவை மறைத்து ஒரு இலை இருப்பதாய் சொன்னாய் நீ.   வடக்கிலிருந்து காற்று வீச அதை உன் மேற்குக் காற்று என்றாய் நீ. இடையில் மலை இருக்கிறது சொன்னாய் நீ.   மலையில் தெறித்து வண்ணம் மாற மலையின் உயரம் பார்வையை மாற்ற மலையில் பட்டு காற்றுத் திரும்ப இடையில் ஒரு மலையிருக்கிறது சொன்னாய் நீ   அப்படியே மலையின் பெயரைச் சொல்லிவிடு. அந்த மலையின் பெயர் என்ன?
Read more